Samaín: tradición e diversión 🎃

O centro preparouse para festexar unha das datas máis máxicas e misteriosas do ano... o Samaín! Recordamos o gran valor histórico e cultural deste día, pois antigamente pensábase que nesta noite as fronteiras entre o mundo dos vivos e o mundo dos mortos se unificaba, sendo unha noite de maxia, medo e rituais.

Para comezar o día con emoción, convertimos a planta baixa do centro nun túnel do terror polo que pasou todo o alumnado. Para ambientar o espazo empregamos cartón reciclado para facer lápidas e tumbas, transformamos lonas en cortinas tétricas, reutilizamos elementos de decoración antigos, algodón para crear teas de araña...

O alumnado, acompañado polos mestres/as, recorreu o túnel con moita valentía, aínda que levaron algún que outro sustiño pero de forma divertida. Que valentes foron! 😄👻

Despois de tanta intensidade, recuperamos forzas cunha chocolatada con churros gratuíta, grazas a churrería Sandra (@churreria_chocolateria_sandra) en colaboración coa ANPA e co concello de Boimorto. Estaba todo riquísimo! 🍫☕

E para rematar o día... vimos todos xuntos a película Coco. Un final perfecto para unha xornada de convivencia, diversión e aprendizaxe!

Así, este día converteuse nunha ocasión para aprender sobre a nosa cultura, desfrutar da tradición galega e fomentar hábitos sostibles.

Ata a próxima aventura! 

Vasoiras terroríficas e sostibles

Este ano celebramos o Samaín dun xeito moi especial. Quixemos poñer a creatividade ao servizo do medio ambiente… e o resultado foi increíble! 🌍♻️

As familias e o alumnado puxéronse mans á obra para crear as súas vasoiras terroríficas e sostibles, elaboradas con materiais reciclados ou de refugallo. Cada vasoira é diferente, orixinal e chea de imaxinación: hainas coloridas, moi terroríficas, algunhas feitas con materiais da natureza (paus, follas, espigas...), cartóns, follas de periódico,… e todas cun encanto especial! ✨

Agora, o centro está cheo de vasoiras que nos fan sorrir e recordar que o Samaín tamén é tempo de compartir, de crear e de aprender xuntos.

Moitas grazas a todos os que se animaron a colaborar nesta proposta!

📸 Podedes ver aquí unha mostra.

O Faladoiro

No noso centro cremos que aprender e compartir ideas é máis divertido cando o facemos xuntos! Por iso, poñemos en marcha “O Faladoiro”, un espazo pensado para que alumnado, familias e profesorado poidan falar, compartir experiencias e descubrir novas formas de coidar o planeta 🌍✨.

Un faladoiro é un encontro aberto e participativo, onde todas as voces teñen cabida. Non hai límites: podemos falar de reciclaxe ♻️, aforro de enerxía ⚡, coidado das plantas e animais 🌱🦋, alimentación sostible 🥦… e incluso calquera outra idea interesante que queirades compartir.

Calquera familiar do alumnado pode participar, e pódese facer ao longo de todo o curso, escollendo o momento que mellor vos conveña.

Dende o centro, estamos encantados de escoitar as vosas experiencias, propostas e suxestións. Cada faladoiro é unha oportunidade para aprender uns dos outros e para fortalecer a nosa comunidade educativa, facendo do coidado do medio ambiente algo compartido.

Anímate a participar!

Descubre a paisaxe e a sostibilidade🌿

Neste blog queremos convidarvos a observar e descubrir as paisaxes que nos rodean todos os días. Cada unha delas ten elementos únicos, unha diversidade sorprendente e un valor cultural e simbólico que merece ser coñecido e coidado.

O noso obxectivo é crear unha relación respectuosa coa contorna e fomentar unha actitude sostible dende idades temperás, para que aprendamos a coidar do planeta dende pequenos. Aquí compartiremos ideas e propostas para mellorar a calidade das nosas paisaxes, propoñendo cambios positivos e significativos no noso entorno.

Neste blog, o alumnado será o protagonista. Participará activamente, observando, reflexionando e propoñendo accións que poidan marcar a diferenza. Falaremos de como pequenos xestos diarios, como respectar os espazos verdes, reciclar ou implicarnos en proxectos locais, teñen un gran impacto.

Este é un espazo para observar, aprender e actuar xuntos. Cada pequeno xesto conta! 👣💚

ACOMPAÑÁDENOS NESTA AVENTURA!