Saída didáctica a PoboAventura

O alumnado de Infantil e Primaria gozou dunha fantástica xornada en PoboAventura (Curtis), un espazo de ocio educativo e turismo de natureza situado na Reserva da Biosfera das Mariñas Coruñesas e Terras do Mandeo.

O alumnado de Infantil e 1ºEP participou nunha busca de tesouros na natureza, percorrendo a contorna do río Carregal e seguindo pistas que os levaron a descubrir diferentes elementos que forman parte do ecosistema do río. A experiencia completouse cun contacontos de natureza, protagonizado por un neno e unha nena que, a través dunha historia interactiva no bosque, ensinaron como sentir, valorar e axudar á natureza. A xornada rematou con xogos populares.

O alumnado de 2ºEP, 3ºEP e 4ºEP converteuse en auténticos exploradores participando nunha actividade de rastrexo no medio natural. Durante unha ruta ao carón do río, tiveron que localizar pistas e superar probas relacionadas co ecosistema do río, poñendo a proba a súa capacidade de observación e traballo en equipo. Tamén realizaron a Xincana dos Pobos, unha auténtica viaxe no tempo a través do museo, onde descubriron como vivían os nosos antepasados. Convertéronse en primitivos, castrexos e romanos, participando en diferentes xogos e desafíos relacionados con cada época histórica. Ademais, gozaron dos ecoxogos, unha serie de actividades elaboradas con materiais naturais e de refugallo, que lles permitiron reflexionar sobre a reutilización e o aproveitamento responsable dos recursos.

Por último, o alumnado de 5ºEP e 6ºEP participou nas mesmas propostas, pero cun nivel de dificultade adaptado á súa idade. As probas incluíron retos máis complexos, actividades que requirían unha maior capacidade de análise e cooperación, así como unha interesante iniciación ao tiro con arco, que espertou un gran interese.

Mirade que ben o pasaron! 

As nosas amigas, as abellas

Como xa vistes en entradas anteriores, este curso o alumnado de Infantil e Primaria realizou unha interesante saída ao Enredo do Abelleiro, onde puidemos achegarnos ao fascinante mundo das abellas e descubrir a súa importancia para a natureza e para as nosas vidas.

Antes da visita, o alumnado de 4º de Educación Primaria levou a cabo un pequeno proxecto de investigación titulado “As nosas amigas, as abellas”. A través deste traballo aprenderon moitas curiosidades sobre estes insectos tan especiais: como viven, como se organizan nunha colmea, que función desempeñan e por que son imprescindibles para o equilibrio dos ecosistemas.

Unha vez rematado o proxecto, compartiron todo o aprendido co alumnado de Infantil e Primaria mediante unha presentación moi amena e participativa. Ademais, para reforzar os contidos traballados, prepararon diferentes pasatempos e actividades relacionadas co mundo das abellas.

Mirade que ben o fixeron! 

Dossier pedagóxico "O reino fungi"

Este curso o alumnado de Infantil embarcouse nun proxecto de investigación sobre o Reino Fungi. Todo comezou cunha provocación moi especial: na bolsa dos sombreiros máxicos apareceron uns misteriosos cogomelos que espertaron a curiosidade dos nenos e nenas. A partir dese momento, comezaron a súa investigación!

Para levar a cabo o proxecto, contaron con caixas de cogomelos que incluían diferentes ferramentas relacionadas coa súa recollida e estudo. Entre outras moitas aprendizaxes, investigaron sobre un cogomelo moi peculiar, a Fistulina hepática, coñecendo as súas características e curiosidades; sobre os cogomelos luminiscentes, capaces de emitir luz; e tamén outros moi curiosos que lles chamaron especialmente a atención, como os brincabois.

Tamén descubriron por que os cogomelos pertencen ao Reino Fungi e aprenderon as diferentes partes dun fungo: o micelio (composto de hifas), o pé, o anel, o sombreiro, as escamas e as lamelas. Ademais, aproveitaron estes contidos para traballar a lectoescritura, identificando e escribindo o nome das distintas partes dos fungos.

Outro aspecto importante da investigación foi o coñecemento do protocolo de recolección dos fungos e das ferramentas necesarias para facelo de forma responsable. Así, aprenderon para que serven o cesto, as luvas, os coitelos, as guías de identificación, os cepillos e as cámaras de fotos.

Na aula tamén gozaron de minimundos de outono nos que os grandes protagonistas eran os cogomelos, favorecendo o xogo, a observación e a creatividade.

Ao longo de todo este proceso estiveron guiados pola súa titora Belinda, utilizando como bibliografía principal os libros “Reino Fungi. Mundo entretecido” e “Cogumelos de Galiza”.

A continuación, deixamos unha mostra do dossier elaborado durante o proxecto para que poidades coñecer máis de preto todo o proceso de investigación.

Recreación de fondos mariños

O alumnado de 2º-3º de EP, na materia de Plástica coa profe Sarai, recrearon diferentes fondos mariños utilizando materiais sinxelos.

Para elaborar os seus traballos empregaron material de refugallo, como: rolos de papel hixiénico, esponxas vellas e distintos tipos de macarróns, aos que deron forma e cor para crear corais, algas, peixes e outros elementos do mar. A través desta actividade, ademais de traballar a imaxinación e a expresión artística, tamén reflexionaron sobre a importancia de reutilizar materiais e coidar o medio ambiente.

O resultado foi un conxunto de obras cheas de cor e conciencia ecolóxica, demostrando que é posible crear arte con materiais que normalmente acabarían no lixo.

Mirade que ben lles quedaron!

Obradoiro con follas da natureza

Hoxe tivo lugar na biblioteca un obradoiro organizado por tres alumnas de 5º-6ºEP: Noa S., Khadija e Suhaila.

A actividade consistiu na creación de animais empregando diferentes follas recollidas da contorna. Con moita ilusión e preparación, as tres alumnas guiaron ao resto dos participantes para transformar follas en diferentes animais: paxaros, ratóns e cocodrilos.

Durante o obradoiro, os nenos e nenas puideron experimentar coa súa creatividade, observando como elementos tan sinxelos da natureza poden converterse en auténticas obras de arte.

Queremos felicitar a Noa, Khadija e Suhaila pola súa iniciativa, responsabilidade e capacidade para organizar unha actividade tan entretida.

Parabéns ás tres polo traballo realizado! 

Senda das cegoñas de Maceda

O alumnado de Infantil está realizando un proxecto de investigación sobre as cegoñas, unha experiencia que está a espertar moita curiosidade e entusiasmo na aula. Nesta ocasión, realizaron unha saída ata Maceda (Ourense) para observar máis de preto o hábitat destas aves e seguir recompilando información sobre os seus costumes, os niños e a súa relación coa paisaxe.

Esta actividade puido levarse a cabo grazas á colaboración da asociación Amigas das Cegoñas, que acompañou ao alumnado nesta experiencia e lles axudou a descubrir moitas curiosidades sobre estas aves. Ademais, tivemos a oportunidade de compartir a xornada co alumnado do colexio de Maceda, facendo da visita unha experiencia de convivencia.

Ao longo deste proxecto descubriron moitas curiosidades sobre as cegoñas: as cores das súas plumas, brancas e negras, o tamaño e a forma dos seus niños, como son os ovos, as longas patas e o peteiro, así como os “polluelos”, que medran protexidos polos seus pais nos niños situados en lugares altos. Tamén aprenderon sobre as súas costumes, observando con moita atención cada detalle.

Esta investigación naceu a partir do interese do propio alumnado e foi medrando pouco a pouco grazas ás preguntas, ás pescudas e ás experiencias compartidas. O proxecto tivo ademais unha repercusión moi especial, xa que a iniciativa apareceu recollida no xornal Faro de Vigo, onde se destaca como un avistamento fortuíto acabou converténdose nun interesante traballo de investigación escolar.

ENLACE Á NOTICIA. 

https://www.farodevigo.es/ourense/2026/05/20/avistamiento-fortuito-convierte-proyecto-investigacion-130424834.html

Seguiremos compartindo convosco todo o que vaiamos descubrindo sobre as cegoñas!

Conto "PRIMAVERA"

Con motivo da celebración do Día do Libro, o pasado 23 de abril, o alumnado de Infantil recibiu da fada Anxana un precioso libro de ilustracións primaverais de Nowordbooks cheo de imaxes inspiradoras sobre flores, árbores, follas, insectos e paisaxes da primavera.

A partir destas ilustracións, a profe Beli propúxolles aos nenos/as inventar un conto entre todos. Deste xeito, fomentouse a súa imaxinación, a creatividade e o relato oral, permitindo que cada alumno/a aportase ideas, personaxes, lugares e situacións. Pouco a pouco, e coa axuda da profe Beli, que foi transcribindo todo o que eles ían relatando, naceu unha historia marabillosa creada integramente polo grupo.

Unha vez rematado o conto, chegou outro momento importante: buscarlle un título. Xurdiron diferentes propostas moi relacionadas coa natureza e coa paisaxe primaveral: Árbores con flores, Follas, Flores, Auga margarida ou Primavera. Finalmente, e tras poñelo en común, decidiron por consenso que o título do libro sería “Primavera”.

Para completar o proxecto, cada neno/a elaborou a súa propia portada. Utilizando letras móbiles compuxeron o título e realizaron unha ilustración persoal inspirada nesta estación do ano.

Aquí vos deixamos un exemplo: