Teatro | Son salvaxe!

O alumnado de 4º-5º-6ºEP preparouse para gozar dunha saída ao teatro para ver a obra Son salvaxe!, unha historia chea de emocións sobre a relación entre as persoas e a natureza.

A obra conta a historia de Mona, unha nena criada na selva por un gorila chamado Koko. Alí vive feliz, rodeada de natureza e animais, ata que un día os seres humanos invaden e destrúen o seu fogar. Mona é levada á civilización para ser educada e Koko acaba encerrado nun zoolóxico. Aínda que Mona aprende a vivir no novo mundo que lle impoñen, sente que algo moi importante lle falta.

Con valentía, amor e respecto pola natureza, Mona emprende unha aventura inesquecible para rescatar a Koko e recuperar aquilo que de verdade importa. A través desta historia, o alumnado puido reflexionar sobre temas tan importantes como a protección do medio ambiente, o coidado da biodiversidade, o respecto polos animais e a importancia de conservar as nosas paisaxes naturais.

8M | Hoxe, mañá e sempre

Con motivo do 8M, o alumnado de Infantil e Primaria investigou sobre mulleres destacadas de diferentes ámbitos e plasmou a información nun maniquí a través dunha intervención artística colectiva. Esta creación leva por nome “Hoxe, mañá e sempre”, en referencia á canción de Tanxugueiras e Valeria Castro, como símbolo do recoñecemento ás mulleres que abriron camiño e da importancia de seguir construíndo igualdade cada día.

Un dos ámbitos que investigamos foi o medio ambiente e coñecemos mulleres que contribuiron de difrentes maneiras ao seu coidado.

Jane Goodall, dedicouse a estudar e protexer os chimpancés e a natureza.

Greta Thunberg, activista que anima a loitar contra o cambio climático.

Rachel Carson, científica que alertou sobre os perigos da contaminación.

Wangari Maathai, promoveu a plantación de millóns de árbores en África.

Vandana Shiva, defende a agricultura sostible.

Seguiremos observando e investigando para facer do noso entorno un lugar máis sostible e respectuoso coa natureza.

Escoita a canción “Hoxe, mañá e sempre” clicando no enlace.

https://www.youtube.com/watch?v=oo0kip8uhYU

Trípticos sobre a reciclaxe!

O alumnado de 6ºEP estivo traballando na materia de Educación en Valores Sociais e Éticos un tema moi importante: a reciclaxe.

Para aprender máis sobre este tema, elaboraron un tríptico informativo. Primeiro fixeron unha pequena investigación para descubrir e comprender mellor: que é a reciclaxe?; os distintos tipos de contedores e que residuos debemos botar en cada un deles; consellos para reciclar mellor no día a día, tanto na casa como na escola; información sobre SOGAMA e como xestionan os residuos en Galicia; etc.

Despois de investigar, organizaron toda a información e plasmárona nos seus trípticos, empregando textos claros, debuxos e cores para facelos máis atractivos e fáciles de entender.

Parabéns ao alumnado polo seu traballo. Mirade o resultado!

TRÍPTICO 1. 

TRÍPTICO 2.

TRÍPTICO 3.

Aprendemos creando cómics!

O alumnado da materia de Proxecto Competencial elaborou uns cómics moi creativos para aprender sobre a natureza e os problemas ambientais.

Primeiro, investigaron sobre un animal diferente e despois crearon unha historia en formato cómic para explicar como vive e que perigos afronta: o oxolote, un anfibio que pode rexenerar partes do seu corpo; o chimpancé, un dos animais máis parecidos ás persoas; o oso panda, símbolo da protección da natureza; o lince ibérico, unha especie en perigo que vive na Península; o tigre de Bengala, un gran felino ameazado, a serpente de cascabel, coñecida polo son do seu rabo; etc.

Nos cómics, estes animais convértense en protagonistas que falan dos problemas que sofren: a perda do seu hábitat, a contaminación, a caza ilegal ou o cambio climático.

Ademais da fauna, o alumnado traballou outros temas moi importantes: as illas de lixo nos océanos, que afectan a moitas especies mariñas, os incendios forestais, que destrúen bosques e fogares de animais; a DANA, un fenómeno meteorolóxico que pode provocar fortes choivas e inundacións.

A través das viñetas e dos diálogos, explicaron como estes problemas afectan á paisaxe e á vida das persoas e dos animais.

Miarde que cómics tan guais fixeron!

Entroido | Gardiáns do medio ambiente

O Entroido é unha das festas máis divertidas e coloridas do ano. É un momento no que podemos disfrazarnos, xogar, bailar e compartir coa comunidade escolar. Pero este ano, quixemos que o noso Entroido tamén nos axudara a reflexionar sobre a importancia de coidar o noso planeta. Por iso, a temática foi “Gardiáns do medio ambiente”.

O alumnado saíu disfrazado de gardiáns: gardiáns da flora, gardiáns da fauna, gardiáns da reciclaxe, gardiáns do aire e gardiáns do mar e dos ríos. Cada aula simbolizou nunha capa distintos elementos do noso entorno natural.

Todos os traxes foron elaborados no centro en colaboración entre o profesorado, o alumnado e as familias. Cada un leva unha capa, decorada segundo a temática do seu gardián. Ademais, todos teñen un cinturón, uns brazaletes e un antifaz que completan o seu look de gardián ou gardiá.

Os gardiáns da flora foi o alumnado de infantil, que teñen o poder de plantar e coidar árbores, garantindo sombra e osíxeno para o planeta. O seu traxe levaba ramiñas e flores para representar a natureza que coidan.

Os gardiáns da fauna representouno o alumnado de 1ºEP, cuxo poder é defender a biodiversidade e coidar todas as especies. A súa capa estaba chea de pegadas e debuxos de moitos animais.

Os gardiáns da reciclaxe, o alumnado de 2º-3ºEP, teñen o poder de transformar residuos en novos recursos, reducir lixo e ensinar a reutilizar todo o que se poida. O seu traxe leva símbolos de reciclaxe e mini contedores pegados na capa, para amosar a importancia de reciclar e coidar o planeta.

Os gardiáns do aire foron os alumnos/as de 4ºEP co poder de manter o aire limpo e puro, libre de fume e contaminación. O seu traxe leva nubes e elementos aéreos para simbolizar a liberdade e a frescura do aire que coidan.

Por último, os gardiáns do mar e dos ríos, representando polo alumando de 5º-6ºEP, teñen como poder protexer océanos, mares e fauna mariña. O seu traxe leva peixes e algas pegados na capa, para amosar a beleza e a importancia da vida mariña que protexen.

Neste Entroido, todos somos gardiáns do planeta: divertímonos, disfrazámonos e aprendemos a coidar a nosa contorna!

A ra de tres ollos

Este libro fainos reflexionar sobre o coidado do medio ambiente, tamén nos fai pensar na importancia de coidar a natureza. A ra vive nun entorno natural que pode verse afectado polas acción das persoas: a contaminación da auga, o lixo ou falta de respecto polos animais e as plantas.

O terceiro ollo da ra simboliza a capacidade de ver as consecuencias dos nosos actos sobre o medio ambiente. Grazas a el decatámonos de que a natureza é fraxil e precisa do noso coidado diario. Se non a respectamos, todos os seres vivos saímos prexudicados.

Este conto anímanos a ser máis responsables: a non tirar lixo ao chan, a aforrar auga, a respectar os animais e a protexer os espazos naturais. Pequenos xestos poden facer grandes cambios e axudarnos a construir un mundo máis limpo, xusto e sostible para todas e todos.

RELACIÓN COA AXENDA 2030

O conto Ra de tres ollos pode relacionarse coa Axenda 2030 e cos Obxectivos Desenvolvemento Sostible (ODS), xa que promove valores de respecto, coidado da natureza e convivencia responsable.

En primeiro lugar, conecta co ODS 14: Vida submarina, ao destacar a importancia de manter limpos ríos, lagoas e mares, espazos nos que viven animais como a ra protagonista. A contaminación da auga afecta directamente aos seres vivos que dependen dela.

Tamén se relaciona co ODS 15: Vida de ecosistemas terrestres, xa que nos lembra a necesidade de protexer os hábitats naturais, respectar os animais e coidar as plantas para manter o equlibrio da natureza.

Ademais, o libro contribúe ao ODS 12: Produción e consumo responsables, ao animar ao alumnado a reflexionar sobre os seus hábitos diarios, como reducir o lixo, reutilizar materiais e coidar os recursos naturais.

Traballar este conto na aula axuda ao alumnado a comprender que, con pequenos xestos cotiáns, poden contribuir a construir un mundo máis sostible, xusto e respectuoso, tal e como propón a Axenda 2030.

ACTIVIDADE DO SEMÁFORO DO MEDIO AMBIENTE

Imos pensar nos nosos hábitos diarios e no coidado do planeta. Para iso, imos usar un semáforo de cores. Entre todos e todas decidiremos en que cor colocar cada acción, aprendendo a coidar o planeta con pequenos xestos do día a día.

Plan Director sobre medio ambiente

Hoxe, dentro do Plan Director, visitounos Óscar, membro da Garda Civil, para impartir unha charla dirixida ao alumnado de 5º e 6º de Educación Primaria e ESO. Durante a sesión, Óscar explicou que é o SEPRONA (Servizo de Protección da Natureza) e cales son as súas principais funcións, destacando o seu labor na defensa do medio ambiente, da fauna e da flora.

Ao longo da charla falouse das causas dos incendios forestais, facendo especial fincapé no impacto negativo que teñen sobre a paisaxe e os ecosistemas. Ademais, mostrou numerosos exemplos reais de casos de maltrato animal, co obxectivo de concienciar ao alumnado sobre a necesidade de respectar e protexer aos animais.

Esta actividade resultou moi interesante, xa que axudou ao alumnado a reflexionar sobre a sostibilidade, o coidado da contorna e a responsabilidade que temos como cidadáns para conservar o noso medio natural.

📸 Moitas gracias Óscar!