Conto "PRIMAVERA"

Con motivo da celebración do Día do Libro, o pasado 23 de abril, o alumnado de Infantil recibiu da fada Anxana un precioso libro de ilustracións primaverais de Nowordbooks cheo de imaxes inspiradoras sobre flores, árbores, follas, insectos e paisaxes da primavera.

A partir destas ilustracións, a profe Beli propúxolles aos nenos/as inventar un conto entre todos. Deste xeito, fomentouse a súa imaxinación, a creatividade e o relato oral, permitindo que cada alumno/a aportase ideas, personaxes, lugares e situacións. Pouco a pouco, e coa axuda da profe Beli, que foi transcribindo todo o que eles ían relatando, naceu unha historia marabillosa creada integramente polo grupo.

Unha vez rematado o conto, chegou outro momento importante: buscarlle un título. Xurdiron diferentes propostas moi relacionadas coa natureza e coa paisaxe primaveral: Árbores con flores, Follas, Flores, Auga margarida ou Primavera. Finalmente, e tras poñelo en común, decidiron por consenso que o título do libro sería “Primavera”.

Para completar o proxecto, cada neno/a elaborou a súa propia portada. Utilizando letras móbiles compuxeron o título e realizaron unha ilustración persoal inspirada nesta estación do ano.

Aquí vos deixamos un exemplo:

O Enredo do Abelleiro

O alumnado de Infantil e Primaria realizou unha saída a Portodemouros (Arzúa) para visitar “O Enredo do Abelleiro” e o seu “Museo Vivente do Mel”, para coñecer máis en profundidade o mundo das abellas e a importancia que teñen na natureza.  🐝

Durante a visita, explicáronnos moitas curiosidades sobre estes insectos tan necesarios para o medio ambiente. Aprendemos a diferenciar entre a abella raíña, as obreiras e os zánganos.

Contáronnos que a raíña é a única femia fértil da colmea e a súa función é poñer ovos, chegando a poñer 3.000 ao día. Aliméntase sempre de xelea real e pode vivir ata 5 anos. Só sae da colmea nos voos de fecundación ou cando se forma un enxame. Ten o aguillón máis grande ca as abellas obreiras, que pode usar varias veces. As abellas obreiras son femias infértiles que viven entre 35 e 45 días na primavera e no verán. Tardan 21 días en facerse adultas e aliméntanse de xelea real nos primeiros días e despois de mel e pole. Ao longo da súa vida realizan diferentes tarefas na colmea: primeiro limpan e alimentan as larvas, despois elaboran cera, ventilan e defenden a colmea, e finalmente recollen pole e néctar ata a súa morte. Por último, os zánganos son os machos da colmea e viven unicamente na primavera e no verán. A súa principal función é fecundar á abella raíña durante o voo; despois da cópula, morren.

Ademais, tivemos a oportunidade de achegarnos aos apiarios e descubrir como viven e traballan as abellas.

Tamén realizamos dous obradoiros! Nun deles, cada alumno/a envasou un tarriño de mel que levou para casa e, no outro, elaboraron dous tipos diferentes de velas feitas con cera de abella. Encantoulles!

Moitas gracias a todo o persoal do Enredo Abelleiro pola súa acollida. 🐝

Terrarios de bichos pau

No noso centro seguimos apostando por actividades que conecten ao alumnado coa natureza e fomenten valores de respecto e coidado do medio ambiente. Desta volta, puxemos en marcha a creación dunha pequena exposición de bichos pau no corredor.

Para levar a cabo esta actividade, montamos dous terrarios diferenciados: un destinado aos bichos pau adultos e outro para as crías. Estes espazos foron construídos con caixas transparentes, para que o alumnado poida observar de preto o crecemento e comportamento destes insectos.

No interior dos terrarios colocamos terra limpa, sen fertilizantes, así como paus, cortizas e follas, recreando un hábitat o máis natural posible. Deste xeito, non só garantimos o benestar dos animais, senón que tamén ensinamos a importancia de respectar os ecosistemas e utilizar materiais naturais.

Ademais, elaborouse unha "Guía básica de coidado de insectos pau", onde se inclúe:

• A humidade e a temperatura axeitada.
• A actitude cara os insectos pau.
• A alimentación.
• A limpeza da súa casa.
• A incubación dos ovos.

·        

Faladoiro con Daniel Ares e Nami

Hoxe visitounos Daniel Ares, pai da nosa alumna Nami, e xuntos sorprenderon a todo o alumnado e profesoraado cun espectáculo moi orixinal que combinaba maxia e conciencia ambiental. Comezaron facendo distintos xogos de maxia que deixaron a todos e todas coa boca aberta. Moitos destes xogos tiñan como fío condutor os libros e a natureza.

Ademais, realizaron un pequeno coloquio no que nos explicaron as 5R: reducir, reutilizar, reciclar, reparar e rexeitar e deron exemplos de como eles as empregan nos seus espectáculos.

Queremos agradecerlle sinceramente a Daniel e a Nami o seu tempo, a súa dedicación e as gañas de compartir co alumnado o seu show. Foi unha actividade moi enriquecedora. Millóns de grazas!

Canción sostible "Reciclar"

O alumnado de Proxecto Competencial levou a cabo unha iniciativa moi especial que combina creatividade, conciencia ambiental e traballo en equipo.

Nesta ocasión, os alumnos/as puxéronse mans á obra para crear a letra dunha canción titulada “Reciclas”, unha proposta musical que busca transmitir a importancia de coidar o noso entorno. A canción recolle mensaxes sobre a redución de residuos, a reutilización de materiais e a necesidade de respectar a natureza que nos rodea.

RECICLAS

A terra xa non vai aguantar

hai que deixar de contaminar

o noso mundo non se atopa ben

collemos máis do que a Terra ten.

 

O clima aquí non deixa de empeorar

lixo no aire, na terra e no mar.

Se a capa de ozono queres conservar

tres erres debes recordar.

(estribillo)

Reducir, reciclar, reutilizaar.

 

Colle o cartón, o plástico e o papel

imos decirche o que facer con el

para poder salvar a paisaxe

tes que apostar pola reciclaxe.

 

Para o planeta deixar de explotar

debes pensar en reutilizar.

Se o consumo queres diminuír

os teus residuos deberás reducir.

(estribillo)

Reducir, reciclar, reutilizaar.

 

Se vas á tenda porque tes que mercar

só colle as cousas que vas precisar

e se prefires non contaminar colle

a túa bici para te desprazar.

 

Esperamos que a nosa canción

amose algo ao teu corazón

agora sabes o que tes que facer

e lembra que non hai planeta B.

(estribillo)

Reducir, reciclar, reutilizaar.

AQUÍ A PODEDES ESCOITAR

https://drive.google.com/drive/u/2/home

Poemario ilustrado do medio ambiente

O 21 de marzo, Día Mundial da Poesía, o alumnado de infantil e primaria converteuse en poeta e artista ao mesmo tempo, xa que elaboraron un “Poemario ilustrado do medio ambiente”.

Primeiro, buscáronse poemas relacionados coa paisaxe: o mar, as árbores, os ríos, os animais, a reciclaxe… e, despois, cada alumno/a escribiuno co seu propio estilo e acompañouno cunha ilustracuón propia. Todos estes traballos uníronse para crear un libro xigante. Para iso, reciclouse un mostruario descatalogado que foi doado por unha empresa local, dándolle unha nova vida e converténdoo nunha obra chea de cor e mensaxes importantes sobre o medio ambiente.

O resultado foi un poemario único, feito con moito agarimo e que xa se pode consultar na biblioteca do centro.

Deixamos aquí unha mostra!

Produto final.

 Poemas.

Teatro | Son salvaxe!

O alumnado de 4º-5º-6ºEP preparouse para gozar dunha saída ao teatro para ver a obra Son salvaxe!, unha historia chea de emocións sobre a relación entre as persoas e a natureza.

A obra conta a historia de Mona, unha nena criada na selva por un gorila chamado Koko. Alí vive feliz, rodeada de natureza e animais, ata que un día os seres humanos invaden e destrúen o seu fogar. Mona é levada á civilización para ser educada e Koko acaba encerrado nun zoolóxico. Aínda que Mona aprende a vivir no novo mundo que lle impoñen, sente que algo moi importante lle falta.

Con valentía, amor e respecto pola natureza, Mona emprende unha aventura inesquecible para rescatar a Koko e recuperar aquilo que de verdade importa. A través desta historia, o alumnado puido reflexionar sobre temas tan importantes como a protección do medio ambiente, o coidado da biodiversidade, o respecto polos animais e a importancia de conservar as nosas paisaxes naturais.